POCKET CORNER

Didrik Ingvaldsen é nome principal da vangarda jazzística europea
e o free jazz —en contacto con espazos sonoros procedentes das
tradicións musicais norueguesa e africana entre outras— constitúe
o principal sinal de identidade do seu labor. A música improvisada
mantívose como constante nos numerosos proxectos nos cales,
desde hai máis de tres décadas e en complicidade cun atado
de intérpretes de indubidable magnitude, andou enredado este
trompetista e compositor noruegués (natural de Stavanger, onde
tamén exerce como profesor) a quen sempre se asocia con Don
Cherry e Don Ellis e ao que avalan unha ducia de discos, varias
publicacións e, por suposto, os centos e centos de concertos que
protagonizou ao abeiro das diferentes bandas das que fixo parte, ben
como líder, ben como colaborador.
Ingvaldsen fundou, no 1986, Pocket Corner, a formación na que
depositou máis desvelos e que mellor representa a esencia da súa
concepción musical. A idea de Pocket Corner adquire individualidade
senlleira no carácter atrevido e arriscado, afastado de calquera
ortodoxia e fortalecido pola continua interacción dos músicos
provistos dunha paleta extensa e variada de rexistros e estruturas de
son.

ASTRID JONES

Excede os dez anos de traxectoria Astrid Jones & The Blue Flaps e
consolídase no panorama musical de Madrid como banda suprema
en autenticidade e sofisticación.
O seu son proporciona unha vivencia irrepetible en directo na que
emoción e groove encarnan personaxes principais; un percorrido
a ceo descuberto ente o soul, o jazz, o reggae, o funk e os ritmos
africanos.
Desde un primeiro álbum, Stand Up (2014), ata Shine (2025), o
seu último traballo, gravado en Okoumé Studios e producido polo
guitarrista Carlos Bratt, o da banda, esta non parou de enriquece-la
propia e adorable identidade sonora.
Cada concerto de Astrid Jones & The Blue Flaps vale por múltiples
invitacións a sentir, conectar e deixarse levar da elegante fusión
de estilos e características esenciais, ocasionando momentos que
perduran e mensaxes que vibran alén do escenario.